荷蘭租屋事件薄
（三）一房一廳變兩房冇廳
除咗上次提及坐地起價嘅屋主，亦有用盡方法想攞人着數嘅學生。
呢一次睇嘅屋，係位於市中心非常靠近中央車站嘅一條街。論地理位置，簡直方便到極。不過係一幢舊樓，所以當中嘅裝修比較殘舊。
而今次唔係直接同業主去打交道，而係「二房東」。有一位留學生租左一間一房一廳嘅單位，然後想將個廳變成一間大房自己住，再將本來好細嘅「睡房」分租出去。
不過事前我對單位嘅情況唔了解，到達後個留學生又唔小心反鎖自己喺屋外，結果又要搵人解鎖又要搵業主。由於「緊急」解鎖比較貴（一下子好幾百歐），個留學生就開始同個業主爭論應該邊個俾錢；本身個鎖已經有少少問題，然後個業主又唔係「省油的燈」，兩邊各執一詞。個一刻，我只想睇下間房如何......
結果，間房實在太細，個廚房又窄，而且冇廳。加上距離馬路邊太近，外面遊客經過大聲喧嘩全部聽得到。想像一下，煮完飯連食飯嘅地方都冇，要坐喺床上食，仲要冇日安寧，基本上同住劏房冇分別。大佬呀，我唔會特登走到歐洲就係住劏房啦係咪先？加上個業主都幾難搞，所以我就索性唔考慮呢個單位嚕。
所以呢，喺大城市嘅居住環境唔一定會好過香港。亦都係因為咁，我用咗好長時間先搵到合適嘅長住單位。連我喺香港嘅老母都忍唔住問我想唔想返香港，起碼「好食好住」。不過，出國就預咗唔會事事順景，雖然當年搵屋嘅日子真係好辛苦，不過而家回望，正正因為當年走圍走，對當地房地產市場了解多好多；今時今日亦都多咗好多故仔可以講哈哈！
又：後來發現，其實將個廳改為睡房出租嘅單位都唔少；有啲單位可能每個人只有幾十尺嘅房間，然後只有廚房同浴室係公共空間。地少人多嘅問題其實無處不在⋯
#移民 #移民歐洲 #移民荷蘭 #荷蘭 #西歐 #出國 #留學 #歐洲讀書 #歐洲工作 #歐洲生活 #荷蘭公司 #歐洲公司 #荷蘭生活知多啲 #香港人在荷蘭 #香港人在歐洲 #香港人加油 #搵工 #搵屋 #租屋 #租樓 #租房
Search